O Level Revision : Shona - Zvidudziramazita - Chiitopauro
Chiitopauro zvinoreva chiito chinoshanda sechipauro. Saka chiitopauro izwi rechiito rinoshandiswa kusiyanisa zvinhu.
Chiitopauro
Ichi chiito chinoshanda sechipauro. Chinenge chichishanda basa rokupaura kana kupa rupawo kuzita, sokuti: Jira rakachena. Chingwa chakaoma. Banga rakarodzwa.
Maumbirwo echiitopauro
Maumbirwo acho anofambirana neechiito chakashandiswa. Tsananguro yemaumbirwo inofanira kuratidza zvivakiso
(zvivakazwi) zvakashandiswa muchiito ichocho. Mienzaniso: (i) anoritamba
Chitaridzamuiti + chitaridzanguva + chitaridzamuitirwi + mudzi wechiito + nzvovera yekupedzisira
/a-/ chiratidzamuiti
/-no-/ chiratidzanguva
/-ri-/ chiratidzamuitirwi
/-tamb-/ mudzi wechiito
/-a/ nzvovera yekupedzisira
(ii) rakachena
chiratidzamuiti + chitaridzanguva + mudzi wechiito + nzvovera yekupedzisira
/ra-/ chitaridzamuiti
/-ka-/ chitaridzanguva
/-chen-/ mudzi wechiito
/ -a/ nzvovera yokupedzisira
Zvizere pamusoro pezviito muchazviwana muchitsauko chekuumbwa kwezviito.
(iii) achatonga
chiratidzamuiti + chiratidzanguva + mudzi wechiito + nzvovera yekupedzisa.
/a-/ chiratidzamuiti
/-cha-/ chiratidzanguva
/-tong-/ mudzi wechiito
/-a/ nzvovera yekupedzisa